с.  Носим

Балатон дорын

Эм Венгрияын сэтшӧм ты — Балатон. Паськыд да джуджыд, аддзывлан кӧ, дыр он вермы вунӧдны!. Но Александр Ильич Кочановлы тайӧ местаясыс усьлӧны дум вылӧ мӧдтор понда. Великöй Отечественнöй война воясӧ танкӧвӧй батальонлӧн составын сійӧ, Носим сиктса томиник зон, мездіс Венгрияса каръяс да посёкъяс. Таысь эмöсь наградаяс. Эмöсь и сьöкыдджык пасъяс: Балатон дорса ӧти косьын старшӧй сержант Кочанов контузитчис. Сотчысь танкысь вермисны петны сöмын кыкӧн, Ленинградса зон Кукушкинкöд, мукöдыс колины ыпъялысь машинаӧ.

Мыйла буретш Венгрияса тыыс медвойдӧр воӧ синъяс водзас? Да сійӧн, мый Балатонкӧд ветеранлӧн вежӧрын йитчӧма став серпасыс, кодъясöс сійӧ аддзывліс война помланьыс нин. А война помыс, ставӧн виччысяна, став вынъясӧн да зільӧмӧн матыстана Победа луныс медпервой воö вежӧрас быд фронтӧвиклы.

Кочанов Победаӧдз локтic вир кисьтана тышъяс пыр 3 во, тӧдӧ сылысь донсö. 1942 вося майын 17 арӧса зонмӧн веськаліс Ленинградскöй фронт вылö. 2 лун сöмын вевъяліс велöдчыштны сьöкыд салдатскӧй уджӧ — пыр жӧ мӧдӧдісны оборонаын сулалысь ӧти отрядӧ. Блокада вуджӧдіс бӧръя лунӧдзыс, а сэсся наступайтысь частьяслӧн составын аслас экипажкӧд водзӧ петіс вӧтлыны фашистъясӧс. На дорӧ став лӧглуныс, кедзовтӧмыс сӧльнитчис сылӧн сьӧлӧмын ӧти кӧсйӧмӧ — босьтны водзӧс немецкӧй оккупантъяслысь, вештысьны став сӧветскӧй йӧзлӧн дойясысь да сьӧкыдлунъясысь.

Синявинскӧй вывтасінъяс дорын Кочанов контузитчис. Тайӧ пӧрйӧ сійӧ муртса эз пӧгибнит артиллерийскӧй би улö веськалӧм танкын. Отсалісны ёртъясыс. Бурдӧдчыштӧм-збодермыштӧм бöрын фронтӧвӧй туйясыс танкистӧс нуӧдісны лунвывлань. Кар бӧрся кар мездісны враглӧн позлань нырччысь боецъяс, на лыдын и Александр Кочанов — тӧдчымӧн вежӧрсялӧм да сӧвмӧм, морӧс вылас дзирдалісны нин медальяс: «За оборону Ленинграда», «За отвагу»… Война помланьыс коми сетісны нӧшта ӧти награда — фашистскöй Германия вылын победаысь.

1947 воын сӧмын бергӧдчис служба вылысь гортас Кочанов. Татшӧм нин салдатскӧй службаыд, салдатскӧй долгыд. И сэкся туйяссӧ казьтывлігӧн ветеранлы медводз юрас воӧны Балатон дорын сьӧкыд лунъяс йылысь мӧвпъяс. А сэсся на бӧрся паметяс ӧзйӧны и войнадырся мукӧд серпасъяс.

СНИМОК ВЫЛЫН: войнаса ветеран А.И. Кочанов.

Носим.

Сннмокыс В. Бабинлӧн.

 © Усть-Куломская межпоселенческая библиотека